政壇:林鄭落區晒愛馬仕皮帶
好多富豪名媛都鍾情法國名牌「愛馬仕」(Hermès),原來政務司司長林鄭月娥都係呢個品牌嘅粉絲。
林鄭上禮拜六出席完立法會選舉宣傳啟動禮後,就同政制及內地事務局局長譚志源等高官落區,先後去柴灣及北角同青年人會面交流,順便介紹吓政府新推出嘅青年宿舍設施。
平時着開套裝裙嘅林鄭,當日為咗配合活動,同大家齊齊着上印有「立法會選舉」字樣嘅Polo衫配牛仔褲。件衫可能太長,佢於是將件衫攝入牛仔褲頭,仲不經意露出大大個「H」嘜頭嘅Hermès皮帶。據知呢條皮帶價值五千至六千蚊,睇嚟林鄭都幾捨得裝身喎!