政壇：保安局副局姓乜?黎棟國故弄玄虛

政府遲遲未公布副局長名單，搞到大家都心思思，要估邊個做副局長。我哋早前講過警務處副處長李家超好大機會出任保安局副局長，由警隊二哥變做保安局二哥。

尋日見到保安局局長黎棟國，諗住向佢試探吓副局長係咪李家超，於是就問佢副局長係咪姓李啦，點知佢就答：「陳李張黃何，歐周胡馬麥。」佢見我哋聽到一頭霧水，佢就話：「十大姓氏實有一個中！」佢咁講，答案已經盡在不言中。跟住再問佢政治助理嘅人選係咪又係十大姓氏其中一個？今次佢就話︰「係咪二十個姓都唔知，因為未interview（面試)。」

有準副局縮沙唔撈

咁啱得咁蹺，有線人話我哋知，佢早前見到李家超，恭喜佢將出任副局長，李家超並冇即場否認，線人就話唔否認即係默認咁話。佢又同我哋講，如果李家超做副局長，會帶動警隊高層升職，而高級助理警務處長馬維騄最近如沐春風咁，似乎係警隊二哥大熱。

話時話，副局長面試完成咗成個月，政府理應公布副局長名單。我哋八卦到政府之所以唔公布住，係因為有準副局長臨陣縮沙唔撈，搞到要繼續物色人選。依家立法會選舉臨近，啲政團為咗拉票實會砌新班子博出位，新上任嘅副局長隨時成為佢哋攻擊嘅目標，所以有人縮沙都唔奇。如果係真嘅話，大家都唔使可惜，因為臨陣退縮嘅人都未必係對社會有心、有承擔嘅人啦！