兩蚊搭車好過冇 小恩小惠難安老

望到頸都長，公公婆婆終於可以兩元優惠價乘搭巴士，簡直係得來不易。

六十五歲以上長者同合資格殘疾人士嘅乘車優惠，提前由下月五日起由港鐵擴展到巴士路線；勞工及福利局局長張建宗仲話會爭取明年首季將優惠擴至大嶼山巴士同渡輪，亦會研究將計劃擴展至專營小巴添。

嗱，就事論事，當局推出乘車優惠，包括九十八萬名長者在內嘅一百一十萬人提前受惠，總算係一件好事，雖然遲就遲咗啲，但總好過冇到吖。其實，向長者提供交通優惠，其他地方早就實施咗喇，例如內地，免費乘車優惠多年前已經喺多個城市推行，而澳門四年前亦推出「公交車資優惠計劃」資助長者乘搭巴士，香港今時今日至倣效，簡直失禮。

係人都知，本港交通費昂貴，全球名列前茅，各界一直呼籲當局為長者減輕交通負擔，弊在曾蔭權政府詐傻扮懵，臨收工至推出長者乘車優惠。其實，如果唔係迫於輿論壓力，睇怕佢連咁小嘅事都唔肯做。

香港自稱「國際金融中心」，港府肥到着唔到襪，為長者提供交通費資助比內地城市慢九拍，你話羞唔羞家吖。冇計喇！貪曾在位七年，對民間疾苦視而不見，對長者福祉不聞不問，老人家點會有好日子過吖。今時今日，港人退休生活毫無保障，貧窮長者只能自生自滅。港府安老政策零零碎碎，殘缺不全，所謂老有所依，老有所養，根本係吹水唔抹嘴。

新政府有心撥亂反正，將安老問題列為施政嘅重中之重，今次提前實施長者巴士乘車優惠可以講開咗個好頭。問題係，呢啲小恩小惠不過杯水車薪，仍然止唔到咳，當局必須制訂全面而長遠嘅安老政策，先至係治本之道。否則，兩蚊乘車優惠對貧窮長者嘅最大幫助，好可能只係搭巴士去遠啲嘅地方執紙皮咋。

安老人人有責，凡係惠及長者嘅政策措施都應該優先處理。當局啱啱提出將長者生果金額加倍，十月初會提交立法會審批，唔該議事堂班政客以長者利益為重，咪再玩嘢阻頭阻勢。唔好忘記，公公婆婆手上都有一票o架，叮！