政壇：搞搞政：高永文最怕畀人篤

好多人提起打針就怕怕，其中不乏大隻佬，官場都有個人辦，就係食物及衞生局局長高永文。本身係大醫生嘅高永文尋日出席仁愛堂新成立仁愛堂程思遠世代無肝炎中心嘅開幕禮時，順道親身示範咗畀人篤手指驗乙肝，點知高永文畀護士篤手指時竟然一臉痛苦，搞到經濟動力嘅林健鋒都忍唔住插嘴，揶揄佢少畀人篤手指，或者畀人篤背脊就多啲！

高醫生話，依家好多檢查都用篤手指嘅方法o架，平時梗係佢篤病人手指多啲，言下之意，佢好少畀人篤手指，難怪痛到出晒面喇。結果顯示，高永文嘅檢測結果呈陰性，繼入官場通過品格審查後，高醫生嘅身體狀況亦好好，冇患上乙型肝炎。

捱得苦、捱得高溫廚房嘅高永文原來唔多捱得痛，篤手指時表情一如細路，難怪其他出席活動嘅嘉賓都笑笑口。高醫生之後都善盡責任，呼籲市民要注意自己嘅身體情況，唔同身體狀況要有唔同嘅處理方法。