政壇：A貨貪曾Vs翻生曾灶財

謙遜係美德，「貪曾」曾蔭權當年競選連任特首時，高調報稱自己係「政治家」，廣受劣評，仲搞到「政治家」一詞亦隨即成為貪曾專用嘅揶揄貶詞，點知報名參加九月立法會選舉嘅白鴿黨單仲偕（先刂雞），都報稱係政治家。工聯會王國興都唔執輸，精於書法嘅佢報稱係「作家」，係咪似足「翻版貪曾」對「翻生曾灶財」﹖

立法會香港島選區中產票源較多，所以呢區除咗有職業報稱醫生同大學教授嘅人參選外，依家再添「政治家」同「作家」。只係，先刂雞飛撲出嚟爭住認做政治家，令人啼笑皆非啫。

或者先刂雞前排全力備選冇正職，所以就搞到一時迷失咗都未定，今屆香港島嘅選情的確會令人覺得幾迷失，除咗自由黨劉健儀同新民黨葉劉淑儀兩女針鋒相對外，仲有人民力量劉嘉鴻、民建聯鍾樹根、公民黨陳家洛，連埋獨立人士勞永樂、許清安及吳榮春，真係夠晒熱鬧。