暑期班變奢侈品 窮孩子淪為棄兒

炎炎夏日到,悠悠假期長。為免小朋友無所事事,好多父母都會費盡心思為佢哋安排多姿多采嘅暑期活動,例如參加各式各樣嘅興趣班,令小朋友過一個既充實又有意義嘅暑假。

之不過,唔係個個家庭都有咁嘅經濟能力。有關注團體針對低收入或綜援家庭嘅調查發現,九成半受訪家長認同學童參與暑期活動係基本需要,但超過半數家庭未能為子女安排暑期活動,其中有六成覺得暑期活動費用過高,難以負擔。調查機構建議當局增撥資源,協助社福機構提供更多免費暑期活動。

講真,做父母嘅有邊個唔想子女暑假過得既充實又有意義吖。弊在近年通脹高企,物價上漲,各類成本急升,暑期活動收費亦水漲船高,已經遠遠超出基層家庭嘅負擔能力。以草根階層集中嘅天水圍為例,前排有調查發現,區內各種暑期活動及興趣班今年收費升幅由百分之四到一成不等;其他地區收費升幅仲勁,平均高達一成。

呢,有繪畫班每堂學費由廿蚊升到五十蚊,加足一倍半,問你點頂?對搵朝唔得晚嘅基層家庭來講,闔家外遊諗都唔使諗,連參加暑期班都變成奢侈品,窮孩子只能望門興嘆,唔閉翳就假。

冇錯,養兒育女係家長嘅責任,政府唔係有求必應嘅黃大仙,資源所限,要求公帑全額資助暑期活動係不切實際。但不可不知,小朋友係香港未來主人翁,當局應該盡量提供資源,避免基層兒童因為經濟問題無緣參與暑期活動,成為社會「棄兒」,進一步造成社會不公,製造跨代貧窮。

其實,政府唔係冇嘢可做,官員只要將心比心,將基層兒童當自己子女看待,一定幫到佢哋。譬如,可以盡量提高現有文娛康樂設施嘅使用空間,利用倫敦奧運呢項體壇盛事嘅機會,組織基層兒童參與各種免費或低收費嘅體育活動;亦可以進一步發揮各非牟利資助團體嘅潛能,透過佢哋組織基層兒童參與唔同嘅暑期活動。幫助基層兒童,事在人為嘅啫,非不能也,實不為也。

計太一叮話齋,暑期活動豐儉由人,形式並唔重要,最緊要培養下一代「我做得到」嘅自信。輸喺起跑線上事小,製造跨代貧窮事大呀,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報