SUN熱辣：迷姦水「炸彈」狂襲蘭桂坊

暑期剛至，大量本地學生及放洋返港的留學生湧入蘭桂坊夜蒲，潛藏其中的毒品拆家視這龐大市場為「兵家必爭之地」，近日更有人引入藥效強勁無色無味，俗稱「炸彈」的超級迷姦水，供獵艷「炸女」之用。夜場「毒界」亦趨系統化，拆家為求逃避警方，採「擇日」及「包場」方式出貨，今個夏天毒品勢必炸爆老蘭！

舞池內，男男女女的軀體跟隨音樂放縱扭動，貼胸碰股，舞姿火辣，迷幻燈光照射着一個陰暗的毒品世界。走近吧枱，不難聽到這一句：「你今晚炸咗女未？」

「炸女」這個潮語其實源於近日流入本港，要「搭路」才能買到俗稱「炸彈」的超級迷姦水。

藥效強「炸女」極易

曾接觸過「炸彈」的玩家指出，只要將一滴「炸彈」加入飲品中，其藥效迅速強勁，加上無色無味，「要『食女』、『炸女』話都冇咁易！」據悉，超級迷姦水投入飲品時會發出「啪」聲響，恍如炸彈爆炸故被稱為「炸彈」。蘭桂坊蒲精阿杰表示，毒品與迷藥在夜場半公開銷售絕非秘密，「好多場都有（毒品），拆家通常喺大場散貨，細場就熟人自己take嘢（吸毒），有啲夜場職員本身就係艇仔，要買貨take絕無難度。」

即場啪丸廁所索Ｋ

暑假學生蒲族蒲頭，阿杰指他們是毒販重要客源，「唔只本地，外地留學回港生都係目標，尤其ＡＢＣ（外籍華人）！」他解釋，因外國留學生多不了解本港毒品管制，拆家更易得手，「佢哋買嚟同班friend（朋友）開心吓，有人sell（推銷）咪買囉。」毒品易買，吸食也公然，若是丸仔，蒲友都是當場啪；Ｋ粉則會在廁所內吸食。

記者日前到蘭桂坊夜訪，只見「老蘭」春光無限，玉背、長腿、低胸、貼身迷你裙，十分誘惑。一眾少女愈夜愈迷糊，至凌晨三，四點，夜蒲人士紛紛散去，記者直擊多名神志不清少女昏眩街頭，有的被數名男友人抬上的士；有的跪在地上要男友人攬腰攙扶離開；有的連環撲攬同行數名男友人。眾女甩鞋露底，如有人心存歪念，這班美少女隨時失儀又失身。

採訪期間，記者目擊七、八名牌照科警員聯同約二十名機動部隊，帶同緝毒犬到老蘭查牌，更有女警在夜場門外，要求入內女客逐一打開手袋查看有否藏有違禁品。

可致精神錯亂死亡

而熟知毒品交易流程的阿威則指，差人借查牌「搜毒拉人」的行動並不罕見。他透露，有夜場的「睇場」會「負責核實（買家）身份，根據對方要求搵人供貨」，熟知門路的玩家「響朵」後，不消一會便有拆家現身接頭，「為保安全，有玩家攞貨後，會走去私竇度take。」

阿威續指，有拆家更會「擇日」出貨，「即係將散貨時間group（集合）埋一齊，揀啲人多嘅日子出貨，好似Ladies Night及周五、周六的旺場日子，才帶貨到場，唔使日日帶貨喺身，咪冇咁易出事囉。」他續指，隨着互聯網興起，包場販毒漸成趨勢，「有啲場會搵燈頭（搞手）喺啲冇乜客嘅日子包場，然後燈頭再喺網上吹雞，拆家便可在場中出貨。」現時在夜場較易買到的毒品包括傳統的大麻、冰毒、可卡因、Ｋ仔，以及較新的喵喵、K2及K3等，而「炸彈」之類的迷姦水亦同樣熱賣。但濫用上述藥物可致精神錯亂、失禁、性無能，甚至死亡。香港專業教育學院（沙田）應用科學系講師周卓峰警告，酒的成分主要是水和乙醇，若毒品或迷藥成分與「醇」近似，較易與酒混和。

根據資料，本年首季吸食可卡因和冰毒的人數，分別上升百分之四十七點五及百分之一點三。警方發言人表示，去年涉及毒品案件的被捕人數為五千六百三十九人，今年一至五月被捕人數為二千三百二十六人。發言人指，暑假期間會打擊毒品活動，呼籲青少年切勿以身試法。

資深社工陳鑑銘認為警方除「掃場」外，亦應揪出毒販源頭，以及正視年輕人於私竇吸毒的問題。