SUN微博：打橫嚟講：反智迷信的面容辨析

書本，是知識的容器，人們將智慧、理念刻鑄入紙張裏，記錄和傳授給下一代，讓世界文明進步；書展場域，就是放滿大大小小容器，散發和傳遞給尋找知識的追求者。

香港書展反其道而行，愛做出反智的決定，年年總有一樁叫人搖頭的劣行，今年，推出一個叫乜Q春「面容辨析」的弱能低B鬼把戲。據貿發局副總裁周啟良介紹，這面容辨別技術，可根據讀者的樣貌、性別、年齡作分析，從而介紹講出讀者需要閱讀的書種類型。佢話，如果係斯文靚仔的，這機器會推薦佢睇文藝文化的書，咁！似足成奎安嘅，睇乜呢？你周啟良嘅尊容，是否應最適宜睇o靚模寫真呢？

這「以貌取人」的要不得思維，不只教壞細路，仲大有年齡、性別、樣貌的歧視，唔該林煥光未撤離平機會前，唔好學煲呔翹埋手唔做嘢，請立即去掃佢哋場，因我在此公開投訴佢哋教唆同宣揚歧視囉！

仲有，此等「睇相式」的虛幻玄術，大有迷信成分，不宜灌輸給小孩子的，比洗腦愛國教育更濕毒呀！你班高薪低能嘅人，知唔知o架？

最好笑白癡的，還是這副架生，成日「死機」，未玩先壞；唔壞的，仲PK，就係同一個人，帶眼鏡試後，除下眼鏡，會得出不同答案推介，簡直出醜人前。這類「假大空」的思維，令我好想叫貿發局總裁林天福去辨析一下，讓此神奇科技提吓佢應睇吓有關「腦科」和「神經病」的書籍！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot