政壇:搞搞政:發叔幕後發功保白姐姐入閘

區議會超級議席嘅選情激烈,政圈預料最後一席係建仔李慧琼同民協馮檢基之爭,但謝偉俊嘅另一半白韻琹前日突然報名參選,選情隨即有微妙變化。

尋日翻查白姐姐嘅提名人名單更有驚人發現,唔少提名區議員同新界鄉議局主席劉皇發都有直接或間接嘅關係,首先元朗六鄉至少有四名議員包括沈豪傑、黎偉雄同經濟動力扎根大埔同沙田區嘅議員陳灶良、劉偉倫都有份保送佢入場,甚至連已退出人民力量嘅麥業成都係提名人。

眾所周知,發叔係鄉事派同經濟動力嘅核心,如果冇佢默許,相信唔敢亂咁奉上提名票畀人。有鄉紳估計可能同本身係元朗人嘅謝偉俊有關,有鄉事派則開宗明義話多元政治係好事,表明唔想畀建仔獨大喎!對於有傳發叔背後發功撐白姐姐打建仔啲傳聞,白姐姐接受查詢時多次強調唔好咁多陰謀論,又話謝偉俊幾代都係原居民,所以互相支持,重申參選就係唔想議席畀人壟斷喎!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白