政壇:星爺暗寸李國寶嘥議席

港區全國人大代表兼中銀高層吳亮星,尋日報名參選立法會金融界功能界別,打算接替放棄連任、有「三點不露」之稱嘅李國寶。李國寶之前話喺立法會二十七年係浪費時間,星爺就話唔評論啲議員喇,但就叫大家睇長遠啲,仲話:「之前嘥咗就嘥咗(時間),睇之後實際啲!」唔通佢都認同李國寶霸住個議席虛度光陰?

李國寶之前話喺議會係浪費時間,星爺就話︰「銀行界嘅人都係希望今日做嘢今日有效果,存咗錢就想有利息,唔想嘥咗啲成本。」又話:「之前嘥咗就嘥咗。」希望大家日後睇長遠啲喎。對於李國寶成日畀人話佢唔開立法會,星爺認為:「報咗committee(委員會)就要評估自己。」仲話如果當選嘅話,唔排除到時同其他獨立議員籌組「早餐會」一齊合作,意味以前嘅「早餐會」復活。

至於入咗議會後會唔會成為政府鐵票,星爺話如果新政府想搞好民生嘅心愈大,佢成為鐵票嘅機會就愈高。佢又話依家啲議員成日話「是其是、非其非」,但就好多人都吝嗇於「是其是」,應該讚嘅唔見得有人讚咁話。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

吳亮星