黑工入侵老蘭 酷刑聲請搵笨

香港近年瓣瓣唔掂，國際大都會名不副實。不過凡事有例外，嗱，有樣嘢「國際化」速度快到你唔信，就係外籍非法勞工入侵中環蘭桂坊嘞。

老蘭唔止係遊客心水蒲點，亦係外籍黑工搵食勝地，由於政府打擊不力，嗰度已經變成黑幫操縱外籍僱傭兵食大茶飯嘅九反之地，遲早生人勿近。

蘭桂坊酒吧同夜店僱用南亞裔及非洲裔黑工非常普遍，看門口嘅睇場，招呼人客嘅侍應，前台酒保，後欄廚工，無處不在。非法勞工愈來愈多，治安亦愈來愈差，打荷包、偷手機甚至爭地盤大打出手，幾乎日日都有。截至今年五月，蘭桂坊發生嘅盜竊及扒竊案超過一百宗，已經接近舊年全年數字嘅七成，問你驚未！

更得人驚嘅係，黑幫趁老蘭七國咁亂乘機分一杯羹，招攬大批南亞裔及非洲裔僱傭兵收陀地、販毒甚至賣淫。外籍流鶯艷女當街拉客，已經成為蘭桂坊一景。

呢班黑工好多都係以政治難民身份，向本港申請「酷刑聲請」嘅南亞裔及非洲裔人。酷刑聲請係指，非法入境人士只要聲稱喺本國受政治迫害或酷刑，就可以喺香港申請政治庇護，揸住「行街紙」仲可以打工賺錢添。

弊在好心畀人濫用，酷刑聲請變成外籍人士偷渡來港打黑工嘅途徑，同人道關懷原意背道而馳。有見及此，港府○九年尾修例，前年二月起禁止所有非法入境者喺本地打工，立法會日前亦通過修訂草案，為審核酷刑聲請制訂機制。

愈來愈多「政治難民」殺到，加上處理申請速度太慢，目前本港入境處手上酷刑聲請個案就有近六千宗，聲請者留港做黑工個案有增無減，唔止打工，連打劫都有。呢，前幾日就有兩名申請酷刑聲請留港等候審判嘅南亞裔賊人，當街揮櫈毆劫一名印度珠寶商，企圖搶走總值六百萬元嘅鑽石。如果繼續縱容呢班人，前排廣州嘅黑人大暴動，遲早會喺香港重演。

話時話，邊有咁多受酷刑迫害嘅政治難民呀？香港有東方諜都之稱，喺蘭桂坊收集情報嘅三教九流，乜人都有。再講，家陣連全世界最講人權嘅歐洲國家都大幅收緊政治難民審批標準，港府實在有必要再檢討酷刑聲請機制。計太一叮話齋，講人權唔等於做老襯，更唔等於畀黑幫坐大，叮！