政壇：搞搞政：波波願降呢做發展局長

新政府班子上任兩周，麥齊光因涉嫌騙取政府租金津貼被捕而辭任發展局局長，而特首梁振英建議嘅政府架構重組又畀立法會拉布拉到冇影，搞到原本熱傳出任財政司副司長嘅陳茂波變「無業遊民」。政圈近排有傳聞話陳茂波（Paul）臨危受命頂上做發展局局長一職，阿Paul尋日話，如果政府需要幫手，佢會義不容辭。未做得副司長，做住局長都叫有個水泡呀！

麥齊光辭職後，政圈先後傳出阿Paul、特首辦主任邱騰華，以及兩名發展局常任秘書長韋志成及周達明可能接手，邱騰華早前疑似對外放風話想留任原位，韋、周兩人會否脫離公務員體系亦係未知之數，只剩阿Paul「義不容辭」。

發展局工作之一嘅新界村屋僭建問題，呢個「燙手山芋」唔易食，阿Paul話政府有團隊協助，局長最重要係能夠虛心聆聽，推行政策過程中謀求最大共識同理順關係！表白到咁，阿Paul真係水泡上身喇。