政壇：王賢訊夫婦輪住做作家
暑期盛事香港書展尋日開鑼！唔少名人都趕搭出書快車。仁濟醫院總理王賢訊（Vincent）同太太朱穎詩（Vincci）都有去書展，事關Vincent用筆名「虎．望晨」寫嘅第一部小說《輔命師－火紅年代》面世，反應唔錯。周日Vincent將舉行簽名會，一眾仁濟總理已約定去撐場。
老公躋身作家行列，Vincci都唔執輸，年底有望成為女作家，佢話舊年懷孕時，老公經常講卡通歷險故事畀肚中嘅囡囡聽，佢執筆將古仔寫出來，加埋自己嘅想像，依家夠寫三本書，書名暫定為《南山七小福》，故事講述七隻被壽星公收養嘅神仙狗仔被派到凡間為人類消災解難嘅遭遇，大人細路都啱睇o架！
王賢訊（右）及太太朱穎詩品味相投，一樣鍾意寫書講古仔。