政壇：李鳳英退休專心醫舊患
完成第四屆立法會議員任期嘅勞工界李鳳英將退下火線，退休除咗享受人生，最重要係勤做物理治療，恢復○九年喺中環舊立法會大樓碌落樓梯後受創嘅身體。英姐話，雖然當年成功做手術將盆骨移正同取出碎骨，但至今仍然深受後遺症困擾，依家唔可以坐或企得太耐，連落雨行路都有心理恐懼，擔心一個唔小心會再次跣低跌傷。
佢又話，手術後因為要即時重返立法會主持調查梁展文事件專責委員會，惟有放棄去醫院接受物理治療，錯失咗復康嘅黃金機會。至於退休後有乜活動，佢話打算幫勞工權益講座擔任客席講師，仲會去社區中心學書法，等到任職司機嘅老公明年退休後，就齊齊去歎世界。立法會嘅重任就會交畀勞聯主席潘兆平承擔。