政壇：高永文嘆政府高熱難捱

新一屆政府運作半個多月，一眾官場新丁尚未適應新工作、新架構，已被僭建問題引發的連串風波打得昏頭轉向。因為單位打通而遭質疑嘅食物及衞生局局長高永文曾經做過醫管局，參加過抗沙士大戰，尋日講起入咗新政府呢個熱廚房都大嘆好熱，比佢想像「更熱」，因為個「熱廚房」有成四十幾度，佢仲話，家吓每朝新班子開會時氣氛都好凝重。

直認做官確唔易

高醫生係新丁問責官員中知名度相對高嘅一個，最新公布嘅民調，更顯示佢嘅支持度係局長之最，不過呢啲優勢並冇令高永文避過外界對問責官員嘅高要求，佢亦係新班子中最先畀人踢爆負面新聞嘅一個，高醫生尋日接受一個電台訪問，就直認做官的確唔易。

佢話，人類喺攝氏六十五度以上無法生存，如果浸喺四十八度熱水中都會好辛苦，而新政府呢個「熱廚房」依家四十幾度，即係接近辛苦喇！佢話冇後悔加入政府，因為預咗付出，但就覺得對屋企人好抱歉。

對於前發展局局長麥齊光被廉署拘捕，上任十二日就辭職，高永文話事件令佢好震驚，佢感覺新班子同事嘅心都唔舒服，但當彼此「你眼望我眼」時，就感受到彼此間嘅支持，寄語大家更加團結，迎難而上。立法會選舉提名期尋日開始，高醫生認為，官員唔應該參與任何一位已經表明參選人士嘅活動，避免令人覺得官員影響選舉。