分拆教材照加價 庸官坐視書商奸

港府之前整色整水，話教科書分拆教材，就可以令書價下調喎。家長最近收到下學期書單嘞，結果可唔可以逃過書商嘅屠刀呢？

大家想知答案，睇睇消委會嘅調查結果就一清二楚嘞。調查顯示，課本分拆教材之後，定價不減反加，平均加幅有百分之零點八。小學用書方面，有五成四課本分拆教材，平均加價百分之零點六。中學用書仲離譜，只得一成四課本有分拆定價，平均加價百分之一點二。

消委會嘅調查反映咗兩個事實。第一，願意分拆教材嘅課本少之又少。第二，就算課本分拆教材，照樣加價。一句講晒，所謂分拆教材，根本係廢嘅！消委會表示，對大部分課本分拆教材後仍然加價深感失望，呼籲書商負起社會責任，放下教科書加價屠刀。

唉，書價年年加，家長年年慘，叫書商發善心，唔加書價宰割家長，咪等如叫隻狼唔好食羊，你話有冇可能呢？如果書商唔係老奸巨猾，就唔會同港府反枱，玩到當局面目無光啦，叮！

其實，要幫家長逃過課本加價屠刀，與其呼籲書商負起社會責任，不如呼籲當局負起應有責任，承擔番編製教科書嘅職責，咁仲實際啦。由政府出書，可以打破書商壟斷局面，招標出版又得，自行編製又得，技術可行，民意支持，點解港產官僚死都唔肯考慮呢？日本同內地一直行之有效，點解香港唔得呢？

唔係唔得，係唔做啫！庸官主義教學手冊第一要義，就係多做多錯、少做少錯、唔做唔錯。所以，就算家長被教科書折騰到嗌晒救命，佢哋都坐視不理。最好笑嘅係，家長任人宰割，曾蔭權政府一直闊佬懶理，直到呢兩年民怨累積至臨界點，當局先至焗住介入，又電子教學，又分拆教材，又自行招標出版教科書，結果全部雷大雨小。港府蹉跎歲月，一事無成，帶市民遊咗個大花園，結果書價不減反加，你話係咪搞笑吖！

煲呔曾政府教而不善，無可救藥，梁振英政府啱啱登場，可唔可以帶家長出生天呢？新任教育局局長吳克儉，睇你有冇新思維嘞。嗱，嗰本被指「洗腦」嘅國民教育手冊，固然要處理啦，教科書加價呢個民怨炸彈，你更加要拆掂佢呀，叮！