政壇：政商定格：俏空姐憶華富邨童年趣事
房屋委員會最近製作一系列「屋邨小說」短片，由多名公屋居民親述自己嘅故事，展現佢哋對屋邨同社區嘅感情同印象，尋日推出咗首集《華富拾趣》，靚空姐Koney親述喺港島南區華富邨嘅成長故事。
Koney話由細到大都喺華富邨居住同讀書，住咗二十四年，直到出外工作至搬走。講到童年往事，不外乎「周圍走、周圍玩，踢西瓜波，喺巷尾用背心膠袋當風箏放，好多頑皮得意嘅往事！」記得有次望住大海，見海面有一支好長嘅物體伸出嚟，佢至今依然覺得係潛水艇。雖然如今已搬離華富邨，但佢話依家同兩個家姐每月都會返屋企同媽咪飲茶。