政壇：惡搞打入十大北上詞語
繼早前公布香港回歸十五年內嘅南下詞語後，香港教育學院語言資訊科學研究中心尋日又公布十個最有代表性同使用率最高嘅香港北上詞語，包括訴求、問責、解讀、減持、雙贏、追捧、爆冷、操控、惡搞同智庫。當中以經濟同政治詞語較多，部分詞語源自台灣，再傳入香港同內地，反映海峽兩岸三地語言文化相互融合同影響嘅特點。
不過，有啲北上詞語未能取代內地原有嘅詞語，好似「咪嘴」（內地稱「假唱」）、「模」（內地稱「嫩模」）、「寬頻」（內地稱「寬帶」）、「數碼」（內地稱「數位」）等。研究中心總監鄒嘉彥話，香港詞語北上嘅高峰期喺一九九九至二○○○年之間，主要因為香港回歸後，內地對香港事物深感興趣。