政壇：波波偷雞護主斷正

特首CY梁振英尋日首次出席立法會答問大會，盛傳會出任財政司副司長嘅會計界議員「波波」陳茂波，繼前幾日隔空叫CY「唔好氣餒」後，前排經常避席嘅佢尋日身體力行咁為CY打氣，仲咁好彩抽中佢問問題添！點知，波波一開口就被社民連「長毛」梁國雄質疑佢係咪要避席，開頭主席曾鈺成都諗住放過波波o架喇，點知波波又唔生性，喺補充質詢追問時諗住偷雞問多條問題，但就逃唔過長毛法眼，再提規程問題「報告主席」有人偷雞益未來老細。

主席判長毛得直

故事係咁嘅，話說尋日波波被抽中問問題時，就問CY港人喺內地工作嘅情況。眾所周知，呢個議題CY成日都掛喺口邊，所以長毛一聽到就即刻彈起提出規程問題，質疑波波唔應該問一條咁筍嘅問題益CY背答案。不過，當時主席就話唔受理，畀波波繼續問。

喺CY答完之後，波波又意猶未盡咁再作追問，但唔知點解就問咗CY一條關於香港同東盟自由貿易區貿易額嘅問題。聽到呢條問題，本來唔想再出聲嘅長毛都聽到火起，於是就再彈起大叫離譜，質疑波波因為快做副司長至可以問兩條問題，要求主席裁決，結果主席判長毛得直，話波波的確開咗新題目，取消佢嘅補充質詢，但幫口話CY之前已答得好詳細喇。

呢次波波真係偷雞斷正嘞！事後我哋問番波波點解今次唔避席，佢話因為質詢唔使避喎。不過，佢嘅護住CY之心，真係路人皆見囉！