政壇：政商定格：16歲小說家賣書捐中大

已故大慈善家莫慶堯嘅家族後人尋日齊集中環廣場，因為莫家第三代捐贈新書收益畀中大嘅「博群計畫」。第二代嘅莫華昇係一名律師，佢有個極有趣嘅嗜好，就係收藏清朝歷任皇帝嘅龍袍，佢笑言，若計埋妃子、王爺等帝王之家嘅官服或便服，佢嘅收藏品超過一百件！中大文物館現時就展示緊莫華昇借出嘅矜貴龍袍喇！

佢個仔莫禮恩（James）就係今次慈善計劃嘅主角，James今年十六歲，佢十歲時創作咗本歷險小說《超越時空的挑戰》，講述四位少年穿越時空，尋找解藥醫治媽媽嘅癌症。本書出版，佢哋將收益捐畀中大，城中名人都紛紛現身撐場，前首席大法官楊鐵樑（楊官）新抱楊余夏卿及兩位兒子都有捧場，楊官兩個孫仔高大搶鏡，兩家人原來係世交。

莫華昇仲透露，中大中國文化研究所莫慶堯學術講座年底將喺牛津舉行，講者竟然係退任後決定到牛津大學讀神學嘅前政務司司長林瑞麟！