政壇：搞搞政：阿Paul轉戰九東廿人抬轎

立法會九月嘅選舉好熱鬧，原屬功能界別嘅旅遊界議員謝偉俊（Paul）尋日宣布參選九龍東直選，即時搵嚟最少二十個區議員「抬轎」壯聲勢。據聞觀塘區議會正副主席陳振彬同蘇麗珍都係佢嘅支持者，當中唔少人幫過民建聯同工聯會助選，可謂陣容鼎盛。

盛傳獲中聯辦力撐嘅阿Paul，尋日喺金鐘添馬公園宣布參選，現場所見至少有十多名報稱獨立嘅區議員現身支持，連自由黨成員、黃大仙區議會副主席黃錦超，以及廠商會代表林大輝牽頭嘅C18成員、觀塘區議員姚柏良都有現身力撐。阿Paul有咁多樁腳，難怪有工聯會中人爆料，阿Paul依家擁有嘅樁腳數目比「票后」陳婉嫻當年參選九龍東仲要多，難怪有人為同樣打算喺呢區參選嘅工聯會黃國健擔憂。

九東選情生變，同樣會由航運交通界轉戰港島區直選嘅自由黨主席劉健儀嘅選情亦唔樂觀，該黨榮譽主席田北俊落新界東亦暗湧連連，參選飲食界嘅張宇人亦可能面對梁營嘅黃家和挑戰，選舉唔少得樁腳，自由黨挑戰地區直選，都要向阿Paul抄橋至得。