政壇:品格審查累邵善波「遲到」

港府尋日終於宣布委任邵善波做中策組首席顧問,任期由即日起至一七年六月三十日為止。呢個公布較七一新班子上任遲咗差唔多兩個禮拜,點解呢?據聞,中策組一哥嘅職位懸空同品格審查工作較遲起步有關。

中策組嘅核心人物,包括首席顧問及三個全職顧問喺七月一日都係懸空嘅,只有本身係政務官出身嘅葉文輝出任副首席顧問,外間都有中策組「無人駕駛」嘅質疑,原來梁班子都係啞仔食黃連。據聞,梁班子對中策組首席顧問早有心水人選,就係現年六十二歲嘅邵善波,邵○七年已開始做全職顧問,依家由全職顧問「升呢」做首席顧問,照計唔應該有乜障礙,點知臨門一腳有人話始終係政府換屆,為咗穩陣起見都係做埋品格審查好啲。

依家雖然遲到,但好過冇到,今次事件後有政界中人更向當局獻計,建議應該考慮將中策組任期延至七月一號之後,避免政府換屆期間可能出現職位空缺,可以等新政府有時間走盞。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報