政壇：許家印砌低阿里「爸爸」

《道瓊斯》旗下Dow Jones Insight搞嘅「中國商界風雲榜」，本月將恒大地產嘅老闆許家印列為風雲人物第一位。早排美國研究機構香櫞（Citron）發報告攻擊恒大，搞到佢哋股價大跌超過10%，許家印當時好o架，點知亦因為咁，令許家印成功砌低上個月位於風雲人物榜首位嘅阿里巴巴創始人馬雲。

許總由榜上無名，搖身一變到今個月成為第一名，香櫞實在「應記一功」。因為報告公布之後，許總回應兼反擊，包括見分析員、見傳媒，之後仲報埋警，香櫞又知驚，唱衰完恒大冇耐又「兜番」。結果Dow Jones Insight嘅數據顯示，呢場風波令到許總成為今個月受媒體關注最多嘅中國企業界人士。

再睇另一個調查，許總又有喜事，據《財富》中文網尋日公布嘅二○一二年財富中國500強排行榜，其中喺房地產榜名單入面，恒大雖然收入就唔夠內房老大萬科717.83億元人仔多，要做第二名，不過賺錢方面，恒大就以近114億元人仔，贏咗萬科嘅96億元人仔，成為最賺錢嘅內房。