政壇：「影子CY」立會綵排
特首梁振英（CY）下星期就會出席立法會答問大會，接受議員質詢。今次係佢第一次以特首身份出席答問大會，但對即將結束任期嘅應屆立法會嚟講，卻係最後一次。一向親力親為嘅CY尋日特登去咗立法會一趟視察環境，秘書處亦好細心將佢個發言架（podium）校高啲，因為佢比貪曾高好多呀嘛。
CY尋日喺幾名保護要人組人員嘅陪同下到立法會睇環境，逗留咗五分鐘唔夠就離開，亦冇向秘書處提出乜嘢特別要求。咁順利原來係因為秘書處一早做定預備工作，早上已經派一個同CY差唔多高度嘅人做綵排，仲校高個架，以免CY要「烏」低身睇稿。
去立法會之前，CY先去咗迪士尼樂園主持灰熊山谷開幕禮，不過，佢實在行色匆匆，儀式完成就迅速離開，並無試坐灰熊山谷列車。
梁振英（右三）為迪士尼樂園灰熊山谷主持開幕禮。