政壇：霍公子煩完倫奧憂選舉

十幾日後就係倫敦奧運會開幕嘅大日子，但三間電視台持續鬥法，港人可唔可以透過免費電視睇呢場盛事都未知。港協及奧委會會長兼立法會議員霍震霆尋日似乎已對政府斡旋事件絕望，只係話希望國際奧委會盡快落實事件，提都唔提政府同電視台。呢宗糾紛傾唔掂，曾經做魯仲連約晤電視台談判嘅商務及經濟發展局局長蘇錦樑固然冇面，作為本地體育界代表嘅霍震霆都好煩，事關咁樣吊住唔上唔落，唔止運動員士氣會受損，成個體育界都好冇癮！

特區政府成日話推動本地體育、推廣健康文化，偏偏奧運盛事來臨，卻再次因為轉播權問題唔湯唔水，甚至搞到香港人觀看體育盛事嘅公眾利益成為電視台商業轇轕嘅籌碼，家吓距離盛事只剩十幾日，運動員已經流緊汗衝刺，電視台轉播問題仲係一舊雲，難怪霍震霆尋日回應事件時面黑黑喇！

新進參選 前後受敵

奧運係世界最頂級嘅體育賽事之一，作為體育界嘅立法會議員，兼夾本港奧委會會長，能夠喺賽事中做出成績，都可以轉化為霍嘅政績，為佢九月立法會選舉增加一啲籌碼，依家商業糾紛傾唔掂數，負面作用真係不容低估o架。

講到立法會嘅政績，做咗體育、演藝、文化及出版界議員多年嘅霍公子一直畀人話佢側重喺體育發展，對文化、出版界無咩建樹，所以早前傳出做電影出身嘅港區人大代表馬逢國會挑戰霍公子，尋日又多個「八十後」周俊輝宣布參選，霍公子真係前後受敵，喺呢個情況下，今次奧運更加不容有失。