貪婪病毒擴散 消防高層豪歎

有人話,貪婪係會傳染嘅。「第一貪官」曾蔭權做咗七年港府阿一,有幾多港產官僚受到貪婪病毒感染呢?不如咁啦,問吓消防處處長陳楚鑫,睇吓佢知唔知。

大家可能會問,點解唔問廉署,而問消防處呢?一來因為廉署查貪曾進度慢過龜爬,問佢哋都係嘥氣;二來咯喎,因為消防處已經被貪婪病毒入侵,如果消防一哥懵然不知,就係失職喇,叮!

感染貪婪病毒嘅消防高層叫張溢昌,位居消防安全總區副總長,上月初開始放假等退休。奇就奇在一個退休在即嘅官員,居然仲獲派「重任」,被安排遠赴阿布扎比出席一個國際會議。好喇,等佢嗰頭完成八日七夜嘅中東之行,呢頭就開始放假等退休,時間啱啱好,簡直度身訂造。至於嗰八日究竟交流咗啲乜,學咗啲乜,睇怕就只有佢自己至知嘞。

消防處無人咩,點解一定要派一個即將退休嘅官員出差呢?你知啦,阿布扎比係度假天堂,一個等緊退休嘅官員來到咁嘅世外桃源,仲有乜嘢心機開會交流呀!

消防處員工就講得啱嘞,呢次外訪做唔到將所得交流經驗貢獻部門嘅效果,根本就係浪費公帑。公務員團體講得仲白,指事件難免畀人有私相授受嘅感覺,懷疑有人明益自己友,公幹開會為名,遊埠豪歎為實。

無錯嘞,公幹為名,豪歎為實,呢啲就係貪曾最擅長嘅喇,佢落台前瘋狂外訪歎盡全世界吖嘛,下面班大小官員咪有樣學樣囉。家陣消防處有人又係貪到最後一分一秒,又係退休前享盡公幹遊埠大小便宜,簡直係貪曾翻版呀!

太一叮提醒消防一哥陳楚鑫,積羽沉舟,群輕折軸,貪曾嘅腐敗之路就係由貪小便宜開始。所以咯喎,今次消防處高層圍威喂舔着數,一定要徹查,否則,萬一消防處被貪婪病毒攻陷,就算未必會返去以前收錢至肯救人嘅黑暗年代,消防處變咗自己友圍威喂嘅腐敗處,咁都夠醜陋啦!

上樑不正下樑歪,過氣港府阿一貪婪成性,部門官僚爭相倣效係必然嘅事,今次事件可能只係冰山一角㗎咋。新政府承諾穩中求變,咁就要盡快採取防腐措施,撲滅貪婪病毒喇,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報