政壇：白鴿黨抽水辣仁大生
白鴿黨主席鐵頭仁孖住佢哋嘅屯門區議員陳樹英，出咗幅以「樹·仁同心拍住上」為口號嘅宣傳橫額，雖然大家都知佢哋只係用自己個名玩食字，但就辣興咗樹仁大學學生。
樹仁大學學生會喺facebook度話，有學生喺七一遊行見到，誤以為係大學學生團體嘅隊伍，所以強烈要求白鴿黨跟進，以釋除大家嘅疑慮。我哋問過樹仁大學學生事務處，佢哋就話作為辦學團體，同政黨冇任何關係，希望我哋可以幫佢哋澄清。
唔少網友都話今次白鴿黨抽水抽得認真低莊，又話佢哋冇啲創意。鐵頭仁抽咗人哋大學水，仲要話係「好小事啫」，我哋問佢會唔會停用呢批宣傳品，佢就懶懶閒咁話會交畀助選團處理喎！