政壇：行會開波貪曾現身請願

行政會議尋日正式開波，惹嚟唔少請願人士去為剛入主特首辦嘅CY梁振英開齋，出現嘅請願團體出奇地多，連明日黃花嘅貪曾亦「現身」特首辦。人比人比死人，唔係CY做咗特首後開咗特首辦嘅大門，仲以為煲呔曾以前將請願人士同記者全部拒諸門外係正常做法。

行會成員見到請願人士，基本上都大方接信，但佢哋嘅離場方式一致，會後匆匆循多個通道離開。行會召集人林煥光尋日雖然有去開會，但傳媒等咗幾個鐘都唔見佢。其實傳媒都係提供個渠道畀佢哋曝吓光啫，毋須走得咁神秘吖！

CY上禮拜承諾喺行會開會期間，開放特首辦大堂畀傳媒守候至開會完畢，仲話會配合採訪。尋日夏日炎炎三十幾度，唔使烈日當空守候，記者們固然興奮，但傳媒入到特首辦，就發現上禮拜仲喺度嘅茶几同梳化失咗蹤，唔知佢哋下禮拜會唔會出現番，真正做到配合傳媒採訪呢？