政壇：波波避席唔投票有苦衷

仲記得盛傳將出任副財政司司長嘅立法會會計界議員「波波」陳茂波，當日一句怕有潛在利益衝突所以避席投票，搞到政府欠一票打尖失敗，頓令佢入閣之期唔知潛咗去邊，政府架構重組落實無期。有人就質疑即將入閣嘅佢點解都唔為改組護航，仲話佢政治潔癖云云，不過佢尋日就撰文透露，其實當日政府亦有發短訊畀佢，叫佢喺投票期間唔好入議事廳。

原來波波一早已同政府講咗佢會避席唔投票，有官員亦親自同透過佢隔籬位保險界陳健波發短訊畀佢，叫佢喺投票期間唔好入議事廳。陳健波就話因為議案需獲過半議員支持，而議員在席而唔投票即會被當作反對，議事廳內議員愈多，就愈難獲過半數支持，所以政府當日盡量會請一直唔會支持議案嘅議員離場。

不過事隔多日，波波尋日特意喺報章撰文澄清，好似為自己伸冤咁，仲話自己避席只係要做到「比白更白」，又話「時窮節乃見」。未上任已做定「消毒」工作，唔通佢都覺得現班子危機處處？