政壇:黃錦星牽頭派環保卡片

環境局局長黃錦星上任後,可以改變幾多市民嘅環保態度尚待觀察,不過由自己做起話咁易。尋晚佢出席一個政黨黨慶酒會時,就大派用再造紙印製嘅環保卡片,以及拒戴襟花。

黃錦星自爆話問責團隊已有共識,以後出席公開活動都唔戴襟花、唔接受刻咗名嗰啲紀念品或獎座。佢又話正睇緊環保採購,打算將印環保卡片之類嘅節約精神推廣到其他政策局。

啱啱成為新聞人物嘅政務司司長林鄭月娥新聞秘書Gilford羅莘桉都有現身,仲呻話當日落區遇到示威唔係被警方帶走,而係差人叫佢坐上警車安全啲,其實佢去到差館門口,就轉搭政府車離開。不過,成件事佢最介意嘅唔係被誤會襲擊他人,而係警方公布消息時,形容佢係三十八歲男子,其實佢要到十二月至過生日,依家三十七歲咋!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

黃錦星(右)揚言將喺十八區設廚餘回收中心,餐飲聯業協會會長黃家和梗笑得開心。

羅莘桉笑稱最介意被警方報大歲數。