政壇:政黨谷人氣緋聞滿天飛

立法會新界東地方選區因議席增至九席,惹嚟各方勢力虎視眈眈,初步估算至少有十六張名單,單係泛民主派已有八張,當中有人唔知有意定無意為人民力量籌謀,疑似緋聞成日喺政圈流傳,又大賣各類廣告谷人氣,認真揼本。

吼準車身廣告

人民力量因立會拉布戰令民望急升,連帶對九月立會選舉都雄心壯志,其中被人民力量寄予厚望嘅袁彌明同「慢必」陳志全,首度聯袂參選,幾乎一齊出席活動時啲衫同顏色都襯過,據聞有泛民中人都問過佢哋係咪結婚。呢啲緋聞當然得啖笑,但對於鍾意睇八卦新聞嘅選民有一定市場。

始終選舉要靠真本事,據聞人民力量都有一套完整疑似提升候選人知名度嘅策略,除咗要親身落區同市場接觸,指定動作當然係喺交通工具車身賣廣告,好似港鐵、的士、小巴等都唔放過。佢哋仲疑似財力過人,部分廣告好似巴士車身廣告仍未面世,有部分廣告更會喺立法會提名期間出現,到時自然要申報選舉開支,為提升知名度認真揼本。

不過有時有錢都未必可以心想事成,盛傳好大機會參選港島嘅人民力量主席劉嘉鴻爆料,話佢哋有諗過喺東區嘅小巴車身賣廣告,只不過原來一早畀建制派買晒喎。

話時話,九月立會選舉如箭在弦,各黨派嘅選舉廣告攻防戰會愈嚟愈激烈,賣廣告嘅價錢相信仲有得升,唔知最終受惠係咪啲交通工具廣告部呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白