十五年免費教育 開綠燈勿再甩拖

年年盼、月月盼、日日盼,市民想要十五年免費教育,盼到頸都長嘞,終於喺回歸十五年後先至盼到一線曙光,都咪話唔諷刺。

新政府新作風,呢一線曙光係由新任教育局局長吳克儉帶畀大家嘅。佢承諾,任內十五年免費教育必定成事,上任後百日新政嘅目標,就喺全面訂立推行時間表,以及同業界舉行圓桌會議。吳克儉為十五年免費教育開綠燈,意味六年來備受批評嘅學券制將會被掟入歷史廢紙簍,香港有望邁進免費幼兒教育年代。

無錯嘞,十五年免費教育早就應該推行啦,搞乜鬼學券制吖,搞到家長頭昏腦脹不特止,反而搞到教師人手大量流失,成個業界亂晒大龍,怨聲載道。事實證明,所謂嘅幼稚園學券制,根本只係港府推搪塞責嘅掩眼法。

其實,推行十五年免費教育嘅額外經費,估計每年只係比學券制多幾億元,對坐擁金山銀山嘅港府嚟講,根本就唔係問題。港府以前死都唔做,實不為也,非不能也。貪曾治下嘅庸官團隊人人爭相研習縮骨心法,將少做少錯、唔做唔錯嘅為官八字真言發揚光大,結果就搞到本港教育制度千瘡百孔,落後過人。

叮佢個鎯鎯,細個讀書都讀過啦,一年之計在於春,學前教育就係學生讀書識字嘅春天,學前教育嘅好壞,可以影響一個學童嘅成就,更加足以影響一個社會嘅前途。同樣係特區,澳門早就落實十五年免費教育,曾蔭權政府鼠目寸光,拖延推搪,簡直就係誤人子弟。無計啦,鬼叫過去七年港府嘅施政大權落入貪曾之手咩,呢位過氣特首只係掛住黐飲黐食,蔭庇權貴,邊理得你學童發展、港人福祉吖!

所以話啫,貪曾一落台就雞咁腳離開香港,其實大有苦衷㗎。一來要逃避貪腐刑責,二來咯喎,佢主政七年,施政大失民心,家長學生被佢玩殘,幼學業界被佢玩謝,如果唔走,出街隨時被人掟雞蛋啦!

一句講晒,免費教育十五年,千呼萬喚終出來。嗱,克儉克勤,克勤克儉,十五年免費教育係新政府贏取民心嘅重要一仗,新任教育局局長記住克盡己職,勤懇辦事,千祈咪甩拖呀,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報