SUN微博：打橫嚟講：捉蟲者，見光死！

廣東俗語真係好鬼死正，生猛傳神兼到肉，嗱！有一句，叫做「捉蟲」！

何謂「捉蟲」呢？此乃源自金句「捉蟲入××」的簡略版說法。「捉蟲入××」，即好端端自討麻煩，原本正正常常，健健康康的，卻把蟲仔塞入菊花，唔衰攞嚟衰！

現時的香港新班子裏，其實出了不少「捉蟲」舊電池人物，佢哋係本來已退咗休的高官，好地地，食長糧，印印腳享受人生咪好咯！無端端，受不住做局長的引誘，從悠閒的「他條」生活，跳入水深火熱的熱廚房裏，櫈都未坐暖，便出事了！

話口未完，近日有位官場新貴被揭發串通同僚，用政府給予的房屋租金津貼，互租自置物業，起初，一直迴避，兼死口否認，點知，愈避愈出事，仲被查出二人有權代對方出售佢哋住緊嗰個單位，咁明目張膽的舔到盡做法，佢還敢說「問心無愧」！話法律上是沒違法喎！要唔要臉o架！

最難得的是，仲有位好上司家陣日日保住呢，猛咁講好話，話佢為人正直，百分百信得過喎！喂！費盡心思，走法律罅，就算沒違法，都品格有問題啦！誠信何在？操守何在？做得官，拿得公帑，是否應要避嫌呀！信得過？我呸！

我一早講過，今時今日，做高官，要自我驗清楚，有乜唔乾淨嘅嘢先，因為一見光，即死！唔信？又一件！「捉蟲」吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係敢爆：藉着遊行說＿你

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot