政壇：政商定格：金刀梁做過女校男生
女校瑪利諾修院學校（小學部）前日嘅畢業典禮，邀請咗香港大學校務委員會主席「金刀梁」梁智鴻擔任主禮嘉賓，佢致辭時大爆自己同該校有一段淵源，原來佢喺小學一年班做過該校「女校男生」。
話說二次世界大戰時，日軍侵華佔用瑪利諾修院學校，直至一九四六年先重開校園。當年該校破格收咗少數男生，金刀梁就係其中之一，可惜佢讀咗一年，就搬咗去港島區住，佢亦惟有轉校。
金刀梁話由聖約瑟小學直接升讀聖約瑟書院，但讀到中五時，一心想從醫嘅佢，眼見書院冇得讀生物，於是分別報讀咗英皇書院及皇仁書院嘅預科班。冇幾耐，英皇收咗佢，佢讀咗僅僅一日，又收到皇仁取錄書，最終轉到皇仁讀到預科畢業。
梁智鴻返母校瑪利諾主持畢業禮，勉勵一眾小師妹。