政壇:搞搞政:立會選舉鄉事派撐誰?

自經濟動力話會喺新界東派人出選立法會選舉後,動作一直多多,尋日新界東支部辦事處開幕,由於鄉議局主席劉皇發係主人家,所以一口氣請咗新界東全部九個鄉委會主席或副主席撐場。係咪暗示選舉已獲鄉事撐腰?

但心水清嘅人會記得,上水、粉嶺、沙頭角同打鼓嶺鄉事委員會主席曾話過支持富貴黨榮譽主席田北俊,仲一字排開晒冷畀記者影相,咁究竟佢哋支持富貴黨定經濟動力呢?原來打鼓嶺鄉委會嘅副主席林金貴已過檔經濟動力,上水鄉委主席侯志強就話出席經濟動力嘅活動只屬畀面派對,仲話自己個心一早歸屬田少喎!

同樣有撐場嘅沙田鄉委會主席莫錦貴,最初盛傳建仔葛珮帆獲佢支持,但後尾因建仔同鄉事關係轉差,到新論壇龐愛蘭話希望得到佢支持。尋日我哋再問佢支持邊個,佢實牙實齒話邊個原居民選就撐邊個,咁啱經濟動力邱榮光係原居民,預料佢會力撐,但如果建仔或公民力量都派原居民參選,咁佢又點呢?

其實鄉事派唔係唔信得過,但佢哋位位義薄雲天,個個叫幫手都義不容辭,所以要細心分析,先知佢哋幫邊個。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白