政壇：丁偉銓八個女人伴成長

獅子山下嘅奮鬥故事真係講唔完，好似啱啱上任會計師公會行政總裁嘅丁偉銓都係其中之一。

佢喺公會旗下刊物《A PLUS》透露自小喺西營盤長大，細細個時家境唔太好，爸爸喺佢六歲時患咗重病，四年後過身，一家人節衣縮食。丁家八個子女之中，得佢一粒仔，所以啲姊妹好錫佢。五位姐姐早就輟學出嚟社會工作供佢讀書，媽媽就做兼職幫補家計。佢亦都冇令家人失望，順利入讀港島名校英皇書院讀書。

本來以為好快可以入U讀法律，點知高考成績麻麻，讀唔成法律。佢記番起兩年前喺會計師樓打過工，認為自己都可以入呢行。當時佢一係入讀理工，攞番個會計系高級文憑，一係去英國讀書，攞會計學士名銜，最終揀咗去英國。

佢話艱苦嘅成長環境係成就佢堅定而公正品格嘅因素之一，作為新任行政總裁，喺服務會員與社會大眾之間，會力求平衡雙方嘅利益，佢嘅其他重任，仲包括業界嘅監管改革同推動核數師審計責任改革。