政壇：狂抽林煥光水

從政者最忌優柔寡斷，但偏偏經歷過唔少風雨嘅行政會議召集人兼平機會主席林煥光（WK）仲未識得呢個道理。佢尋日去立法會開會後仲未就去留交代，淨係話今晚平機會開會後會有決定。但查實唔使開會都知結果，皆因佢嘅立場已經冇上星期咁強硬。WK身兼兩職，平機會委員KK馮檢基又話考慮辭職，但外界反應似乎冇咁熱烈喎，如果WK決定留低而KK最後又唔肯辭，咁到時佢一定會招人話柄，睇嚟佢真係要諗吓計仔拆彈喇。

WK話三十幾年嘅公務生涯證明佢唔係拖拖拉拉嘅人，又話佢思考獨立，但要聽咗其他人意見後先至可以決定。佢又話一個成熟嘅公民社會要尊重工作夥伴嘅意見，佢唔可以貿貿然做決定喎。咁佢點解唔喺接受委任前先諮詢委員意見，而要喺受到各方責難後先縮沙話要睇吓其他人點睇先定去留呢？

謝偉俊支持兩者兼得

有水唔抽真係罪大惡極，KK即時跳出嚟鬧WK身兼兩個職位有角色衝突，違反平機會公平獨立嘅原則，話如果WK唔辭就輪到佢辭喎。另一委員謝永齡都覺得WK有角色衝突，又話要同佢交換意見後先決定會唔會要求佢辭任平機會。KK同謝永齡分別隸屬何營同唐營，要求WK辭職似乎都係理所當然。

不過，另一委員Paul謝偉俊就支持WK兩者兼得，至於KK都話辭職，阿Paul就話尊重佢嘅抉擇，仲話唔可以用顯微鏡放大每件事，否則只會一事無成，睇嚟係想暗寸KK有水就抽。