老鼠大如斗 惡菌通街走

香港嘅鼠輩幾時至會被一網成擒？

嗰隻貪威識食嘅大老鼠煲呔曾，到依家仲係逍遙法外，已經夠令人激氣o架啦，點知嗰啲真正老鼠仲篤眼篤鼻通街走，而且隻隻養到肥肥白白，睇見都核突。

唔係嚇你o架，鼠患又有惡化迹象喇。舊年全港鼠患指數升咗零點二個百分點至百分之一點七，其中深水埗、觀塘同元朗成為重災區。如果單睇舊年下半年，更加有六個分區嘅指數比上半年上升，當中以南區升幅最勁，急升三點二個百分點，觀塘就係指數最高嘅分區。

鼠患指數上升，諗起都得人驚。咁都仲未算呀，有立法會議員踢爆，觀塘鼠患嚴重，空置大廈變晒一個個老鼠鐵竇，批發市場同街市更加成日發現死老鼠，真實情況可能比統計數字更加恐怖！

嗱，貪曾未落網，公眾就話(目及)實廉署啫，至於鼠患咯喎，咁就要問食環署嘞。點解鼠患搞來搞去都搞唔掂呀？點解鼠輩橫行署方仲懶懶閒呀？係咪因為食環署懶蛇眾多，所以蛇鼠一窩，搞到香港烏煙瘴氣？

即係咁，港產官僚懶散失職，點只養鼠為患吖，仲有一班吸血鬼o架。天水圍天瑞邨一名少女感染日本腦炎，揭發該邨蚊患極之嚴重，唔少居民被咬到紅紅腫腫。點解天瑞邨得蚊獨厚呢？咪多得港府滅蚊不力囉！

講開又講，天瑞邨蚊患存在多時，但係房屋署闊佬懶理，承辦商亦話之你，係咁意對排水渠注蚊油，其他地方就關人個關，吸血兵團唔猖狂就假！

叮佢個鎯鎯，香港本來已經夠烏煙瘴氣o架啦，好心港產官僚咪再養鼠為患，助蚊為虐！咪話太一叮唔提醒，家陣禽流感捲土重來，搞到成條旺角雀仔街雞毛鴨血，柬埔寨又有神秘病毒肆虐殺人，極速奪走當地六十幾名小童性命。如果香港鼠患蚊患成災，好易爆大鑊嘅咋，嗱，當年沙士慘劇歷歷在目，唔通港產官僚仲未知驚？

唉，太一叮真係唔明白，叫港府滅鼠滅蚊啫，又唔係去打異形怪獸，點解咁困難呢？辦事不力嘅過氣食衞局局長周一嶽都消失咗啦，鼠輩惡蚊仍然橫行無忌，數目有增無減，如果食環署署長梁卓文唔識捉鼠，咪問吓貪曾囉，鼠有鼠路，佢一定教到你o架！

一句講晒，今日唔滅鼠滅蚊，明日一定變捉蟲，各位港產官僚好自為之啦，叮！