政壇：搞搞政：波波做官前遊美叉電

因為泛民主派拉布，令立法會遲遲未通過政府架構重組決議案，盛傳會做財政司副司長嘅「波波」陳茂波，喺立法會任期屆滿後分分鐘成為「失業大軍」，所以佢就趁暑假陪囡囡去美國開學，順便去埋旅行，當係做官前放大假叉足電。

陪細女開學

波波嘅大仔幾年前喺英國牛津大學讀法律學成歸來做律師，依家輪到細女出國留學，所以陪佢開學。波波話囡囡嚟緊四年會去紐約一間著名大學讀文科，但就未決定會主修邊科喎。

雖然佢希望囡囡可以繼承佢嘅會計師衣鉢，但就會完全尊重囡囡嘅決定。佢仲話舊年幫囡囡喺美國康奈爾大學（Cornell University）報咗兩個暑期課程，畀囡囡試吓鍾意讀文科定商科，素來鍾意繪畫嘅囡囡對商科避之則吉，好彩美國唔少大學頭一、兩年可以容許學生自由選修任何科目，所以到時再揀主修科都未遲。