政壇：工業家二代傾做廠心得
香港係咪只有夕陽工業？一班工業家第二代唔認命，決定搞旺廠佬嘅人氣。工業總會青年委員會主席Eric孫榮聰同中華廠商聯合會青委主席顏明潤，日前號召幾十位兄弟姊妹喺銅鑼灣一間酒吧Happy Hour，交流做廠心得，適逢當日係顏明潤妹妹顏明秀嘅生日，一眾青委就準備大蛋糕為伊人慶祝。
在場嘅工總青委副主席劉燊濤話鐘錶零售生意淡靜，行內話「五窮六絕七翻生」，如果七月依然冇起色，咁就冇運行喇！曾經喺北京工作四年嘅Eric就話，內地人對香港嘅神秘感漸漸消失，要持續吸引內地遊客南下消費，確係唔容易。
當晚Eric嘅細佬孫榮良同孫榮亨亦有現身，三兄弟難得同場十分高興，而啱啱學成返港嘅工總副主席鄭文聰女兒鄭凱茵，都有到場湊熱鬧。
俊男靚女齊賀壽星女顏明秀（前排右二）生日，包括孫榮聰（前排左四）、顏明潤（前排左三）同鄭凱茵（前排右一）。