一次過援助難改善生活

【本報訊】「兩個人得八千蚊，睇次醫生已用咗大半，長遠唔可以改善到生活！」七十九歲的譚伯與七十八歲的妻子，以每月一千二百多元租住面積僅七十、八十呎的板間房，依靠二人共二千多元的生果金過活。譚伯直言，關愛基金提供一次性津貼，幫助「唔係好大」，希望政府能提升津貼金額及作長遠援助。

譚伯夫婦於深水埗區租住板間房多年，每月一千二百多元租金，已花去二人月入的一半。

譚伯坦言，夫婦二人每月所得的生果金根本不足以應付生活開支，惟有靠僅餘的積蓄，加上死慳死抵支撐，「淨係會買最平嘅菜，好耐都冇飲過茶。」

睇次醫生冇咗大半

年紀大病痛自然多，長者的醫療開支絕對不可小覷。譚伯與妻子每月均需要覆診，醫療開支每月至少數百元，「我哋上咗年紀，隨時要大筆錢睇醫生。一次過畀八千蚊津貼我哋，可能睇一次醫生都用咗大半。」譚伯直言已甚少出街，估計如無特別大支出，半年至一年便會花光夫妻二人所得的八千元津貼，期望基金能提高資助金額，政府要有長遠方法協助長者改善生活。