禽流揮之不去 怪病兵臨城下

按照傳統習俗，端午節浸龍舟水可以辟邪。不過今年呢招似乎唔係幾靈，嗱，呢頭食完五月糉，嗰頭禽流感又響警鐘，你話邪唔邪吖。

旺角雀鳥公園有店舖嘅雀糞驗出含H5N1禽流感病毒，店內所有雀鳥要銷毀，「雀仔街」要封閉廿一日，所有店舖徹底清洗。仲有吖，當局證實上月底喺九龍塘執到嘅家鴉同樣帶有H5N1禽流感病毒。禽流感病毒無處不在，唔通真係禍不單行？

其實，禽流感對本港嘅威脅從來未停過。上月初一名由內地返港嘅男童證實感染禽流感，當局即時提升流感警戒級別，點知驚魂未過，雀仔街又出事，簡直防不勝防。

除咗本港，其他地方亦唔好得去邊。新疆一個雞場早排爆發禽流感，當局撲殺咗超過十五萬隻家禽；遠在美洲嘅墨西哥亦爆發近二十年來最大規模高致病性禽流感，近兩百萬隻家禽染病。

仲有更得人驚o架，柬埔寨最近大規模爆發不知名怪病，來勢洶洶，中招嘅全部係小朋友。世衞組織資料顯示，當地四月至今已經有六十六名兒童患上呢種呼吸道怪病，其中六十四人死亡，死亡率幾乎百分之百，你話唔驚就假。

千祈咪以為呢種怪病唔關香港事吖，病毒無國界，一個唔好彩，隨時爆大鑊o架。當年沙士由內地傳入，就係因為港府後知後覺，防疫掉以輕心，反應慢幾拍，卒之搞到香港變成疫埠，死咗近三百人，最後更殃及全球，幾乎萬劫不復。

講番禽流感呢筆，自從九七年本港率先爆發，導致多人死亡，十五年來呢種疾病時不時爆一劑，已經成為風土病，市民對大規模殺雞早就見怪不怪。禽流感對香港情有獨鍾，其實一啲都唔奇怪，港府多年來保護環境同改善民生乏善可陳，講多過做，搞到空氣污濁，居住環境惡劣，禽流感呢類風土病唔爆至奇喇，叮！

禽流揮之不去，惡疾兵臨城下，防疫絕對不容有失。新政府上場千頭萬緒，百廢待舉，更加不容有失。正所謂，有殺錯，冇放過，防疫寧緊勿鬆，攘外安內雙管齊下，除咗要加強把關，制訂應變措施，亦要提醒市民加強防範意識。

講到底，與其亡羊補牢，不如防患於未然，新政府千祈咪學前朝條條揈，如果唔係，好易招災惹禍嘅咋！