SUN微博：打橫嚟講：僭建是我家

豪宅「僭建」，是成為香港本土病毒，一發不可收拾，仲大鑊過二○○三年的沙士，愈揭愈有。

由特首選舉掀出僭建風波，不特止燒及唐梁和煲呔，就是新界丁屋也被關注，由歷史遺留的老問題，轉化為政治炸彈，唔知幾時爆，更唔知邊個有能力懂得去拆，或是像老董的八萬五，靜靜地已不存在？

上層未解決，下邊的，卻火燒後欄，一眾新上任的高官局長、行會成員，陸續被傳媒踢爆「家中暗格」；最叫人頭痕的，竟連那位負責檢查梁振英府第有乜違規僭建的專家王金殿教授，自家本身住所都有多項僭建未搞掂，咁！點算呀？香港！

查實，大大小小的僭建，幾十年來都存在的了！只是政府執法不嚴，隻眼開隻眼閉之故。

早年，香港地少人多，窮親戚游水來香港投靠，義字當頭的香港人，醒目又靈活，咪搭吓搭吓，搭出新天地囉！

當一件違法的行為，個個都有份參與，直至感覺是理所當然，甚至人僭你唔僭，是執輸蝕底時，已由犯罪變為合理常態，這才是問題的根源。

同樣，當有人用大話去掩蓋另一大話，愈講愈多，多到追溯唔返轉頭，謊言又成為事實的一部分，這才要命。

「僭建」，好平常啫！被你發現，拆走咪得囉！又唔使死嘅！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot