SUN微博：網絡小說：Sun開封府 第十四章

上回提到展昭斬去捕快大支裝胡椒噴霧、包拯懲戒警務處女職員趙慧腎，自目睹趙慧腎被圍食椒之慘狀，捕頭曾偉紅音亦稍有收斂。話分兩頭，是日一外籍男子於開封府堂外擊鼓，驚擾了香城短暫的平靜。

「升堂！」「威武……」

「來者何人？來自何方？何事擊鼓鳴冤？」包拯見堂下那人金髮碧眼，非我族類，問其出處來由。

"Je m'appelle Jean. Je viens de la France. Comment allez-vous？"（我叫尚。我嚟自法蘭西，你好嗎？）

「咩話？『索媽被勒索，今晚打老虎』?!」包拯一驚，「係咪你的老母，性感很多人call？係邊個勒索你阿媽？」

"J'y viens avec une histoire de corruption."

「你講到好似好大件事咁。公孫先生，你放洋多年，請你翻譯吓，我一句都聽唔明。」公孫先生即時傳譯：「佢話佢係嚟向你告發某人貪贓枉法。」

「曾雀屎已經玩完，香城仲有貪官?!莫非……佢係咪矮仔一名？」包拯急問。

"Oui! Il est petit!"（係！佢真係好矮。）包拯心頭一震。

「佢係咪鍾意飲Lafite？」

"Il l'aime."（佢係鍾意飲Lafite。）包拯心頭再震。

「佢貪腐臭名遠播？」

"Exactement! il est tristement célèbre pour corruption!"（Exactly！咪臭係！）

包拯與公孫先生面面相覷，兩人臉上難掩驚詫之色，遂有最後一問：

「佢係咪首長？」

"Il est le chef."（佢係首長。）

「真係估唔到！」包拯心下了然，怒拍驚堂木，「曾雀屎生為貪官，死為貪心鬼，死而不僵，仲撈過陽界！傳司徒夾帶上堂！我要同樓下地府閻王溝通吓。」

司徒夾帶甫上堂即口吐白沫，連羅庚都揸錯，大叫「出事o架嘛！」包拯一看，即知閻王已上其身。

「閻王你好，我想問曾雀屎走咗未？」包拯向痙攣司徒夾帶問道。司徒夾帶變聲回話：「未走呀，佢喺奈何橋。」包拯囑託閻王：「同我截咗佢！一陣我送番曾雀屎落嚟，補條『屍尾』畀你識別！」

曾雀屎一臉慌張，跪於堂上，全身發抖。

「曾雀屎你生前貪盡中外、死後遺禍陰陽，你可知罪?!」包拯喝問。

「我……我咩都唔知……」曾雀屎聲音顫得比身體更甚。

「死不悔改，用刑！」王朝等人從旁步出，提起手中杖木便打，百杖過後，曾雀屎後庭開出一圈又一圈玉樹花。

「我……我真係唔知呀……」曾雀屎牙縫吐出依然是那一句。

「豈有此理！」包拯喝令再打。此時法蘭西人大叫大嚷，公孫先生與他交頭接耳幾句，面露不安神色。

「包大人借一步說話，」公孫先生上前稟告包拯，「我哋好似拉錯人……」

「點解咁講?!」

「原來個法蘭西人係講緊佢哋前總統薩爾科齊非法收受政治獻金，因為特徵太似，所以誤會咗……」

包拯驚呼：「Merde！」起身俯看堂下，曾雀屎已鬼不似鬼……（待續）