政壇：搞搞政：做人大發聲效果勝議員

九月立法會選舉將至，各黨派磨拳擦掌之際，建仔嘅蔡素玉卻好逍遙，日前出席福建社團聯會晚宴時，更話近年較專注喺港區人大嘅工作，覺得做人大有用過立法會。點解？例如佢向來都好關心嘅環保議題，喺擔任立法會議員期間都冇乜人理會，但係喺人大會議上發聲，就馬上有人和應，並且將佢嘅意見列入珠三角發展綱要之內。

周文耀傳出戰金融服務界

蔡蔡子又話，近日佢留意到嘅立法會消息，都係啲議員長時間困喺議會內淪為按鈕投票機器，咁嘅生涯諗落真係好無謂喎！

雖然係咁，嚟緊嘅九月大戰，多個立法會功能界別已先傳火併消息，好似體育、演藝、文化及出版界，現任議員霍震霆無風無浪做咗十幾年議員，今年傳聞會遇新論壇召集人馬逢國挑戰；金融服務界近日亦傳出港交所前行政總裁周文耀、中銀國際副執行總裁謝湧海等被游說出戰嘅消息，現任議員金勞詹一聽周文耀個名都話願意讓賢。