政壇：鼠王芬出書白字百出
著書立說本來係好事，但若粗疏了事就可能有反效果。法律博士兼法律學者出身嘅立法會議員梁美芬用咗成年時間，嘔心瀝血寫咗本二百幾頁嘅巨著，仲印咗二千本，尋日卻成為立法會嘅笑柄，雖然多數都係校對出錯，但梁博士睇嚟都要跟跟。
事關有鼠王芬之稱嘅梁博士喺書中大談同老公嘅感情，可惜錯字連篇兼導人諗歪，例如「讚夫君為人「埋（坦）蕩蕩」（黑圈示），至於二人感情則屬「逝（細）水長流」。最離譜係佢話夫婦二人性格有異：「也許由於我們成為對方性的弱點的補足，所以才可以走在一起」，估計佢係想寫性格，但漏咗字。
出身自法律專業嘅梁美芬用字遣詞應該好小心，今次一字之差變咗好似大爆夫妻閨房密事，其他諸如「遏（竭）盡所能」雖係小兒科，但就唔怪得有議員睇得非常「抗（亢）奮」笑唔停。
