政壇:貪曾授勳大細超搞分化

貪曾七一卸任後拍拍屁股離港,留低嘅蘇州屎卻唔少,好似佢最後一次拍板嘅授勳名單就疑似大細超,據聞激嬲唔少人士同組織,如近年較具規模嘅名人二代組織百仁基金同菁英會,近年做咗大量青年工作,但授勳名單上完全冇佢哋份,授勳變成搞分化,貪曾真係害人不淺。

親疏有別係貪曾嘅慣技,勳章頒畀自己友,對一眾默默耕耘嘅組織就視而不見,對近年做咗大量青年工作嘅百仁基金、菁英會同香港青年聯會嘅努力亦當透明。有知情人士聽聞,只要捐咗錢就有得獲授勳,但只搞青年工作而唔捐錢,就要下年至有份補攞勳章。

有人仲分析,貪曾向來同梁振英(CY)對着幹,喺西九比賽評審風波及新政府架構重組過程中暗中搞亂檔,咁啱百仁基金同菁英會又喺之前特首選舉幫過CY搞過活動,唔通因而出事?如果係嘅話,就可見有人心胸狹窄。講到尾,授勳只係一個分餅仔活動,目的應係鼓勵,而唔係分化囉。涉及今次事件嘅貪曾、授勳委員會主席兼前政務司司長林公公,甚至專責青年事務嘅民政事務局局長曾德成實在責無旁貸。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報