危樹隨時殺人 港產廢柴靠害

唔知係各花入各眼吖，定係蔫豬頭遇着個盲鼻菩薩，有外國機構居然將香港評為全球最宜居城市，係咪搞笑呢？如果外國傳媒嚟香港行番轉，尤其係留意吓路邊嗰啲搖搖欲墜嘅病樹爛樹危樹，睇怕會即刻改變初衷。

唔係嚇你o架，喺香港行街屬於「高危動作」，隨時禍從天降。本報記者同樹木專家早排巡查多處地方發現，路邊危機四伏，人流高嘅區域，樹幹已腐壞嘅「甩皮樹」、「生菇樹」隨處可見，颱風季節已到，四年前赤柱塌樹壓死大學女生嘅悲劇，隨時可能重演。

發展局轄下咪有個樹木管理辦事處嘅，唔通連呢個衙門都變埋廢柴？叮！提起樹木辦，真係無名火起，佢哋簡直連廢柴都不如。原來全港仲有好多危樹未列入登記冊，路邊到底有幾多呢種隨時引爆嘅計時炸彈，根本冇人知。

呢，九龍塘太子道西有十幾棵樹頭菜，除咗樹幹被真菌入侵，樹底仲有多處甩皮，一旦打風分分鐘成棵樹冧落行人路，嚴重威脅路人安全。最離譜嘅係，成個九龍城區嘅危樹名單，居然得一棵樹頭菜記錄在案。樹木辦管樹成碌木咁，問你服未！

就算登記冊榜上有名，亦唔等於冇危險，照樣難逃被遺棄厄運。嗱，樹木辦拍晒心口話會因應樹木狀態定期覆檢，但講就天下無敵，做就冇心冇力，好似九龍公園一棵已經登記嘅大葉合歡咁，對上一次檢查係舊年四月嘅事，依家已經出現「內夾樹皮」問題，隨時冧得，你話喇，有登記同冇登記有乜嘢分別吖？

叮！有危樹唔登記，有登記冇更新，正如立法會議員話齋，當局懶理危樹，漠視市民安全，名冊根本形同虛設。話時話，當局兩年前敲鑼打鼓成立樹木辦，點知多隻香爐多隻鬼，佢哋斬樹一流，護樹九流，好樹斬完一棵又一棵，危樹冧完一棵又一棵，周不時傷及無辜，樹木辦不如索性改名做「廢柴辦」或者「毀樹辦」，咁就實至名歸嘞。

講開又講，○八年赤柱冧樹殺人悲劇之後，當局為咗補鑊，由前政務司司長唐英年做護樹大隊長，結果搞出樹木辦呢個不倫不類嘅怪胎。唐唐敗選特首之後消失隱形，而樹木辦就繼續做廢柴，成事不足，敗事有餘，睇怕都係爛尾收場居多，大家出街千祈打醒十二分精神，港產廢柴靠唔住o架！