政壇：搞搞政：陳茂波做逃會威龍

新一屆政府殘缺就任後，副司長唔知幾時先可以上任，盛傳將出任財政司副司長嘅陳茂波（Paul）處境好尷尬，佢早前已經因為有潛在利益衝突，無去到政府架構重組議案決議案投票，近日立法會繼續會議，佢有時現身，有時又因為未來官職迴避做逃會威龍，我哋翻查立法會六月份嘅議員申報，原來阿Paul已辭任會計師行合夥人同受薪董事職務，似乎已執清個人手尾，做好入政府嘅準備。

以家吓立法會傾架構重組嘅進度，阿Paul幾時先做到副財政司司長仲係未知之數，但尋日立法會政府帳目委員會發表本屆最後一份報告，身為副主席嘅阿paul又唔見人，無出席發表報告嘅記者招待會。不過，另一邊廂佢又喺立法會審議一條公司法例嘅修訂案表現好勇，話受會計界之命反對政府呢項修訂，仲批評政府提出呢條「會計界廿三條」修訂前，未有同會計師公會溝通，所以佢只好憑良心做應該做嘅事，同政府唱反調。

九月立法會選舉在即，據聞做咗十幾年工程界議員嘅何鍾泰（Raymond）連任有危機，因建制與泛民主派打算分別派出前工程師學會會長盧偉國及傳聞正申請退休嘅水務署總工程師李智明參選，有消息更指盧偉國已獲西環祝福，盧尋日冇回覆我哋查詢。