政壇：政商定格：無官一身輕孫公煮飯仔
新舊政府交接後，多名前局長卸任，無官一身輕去放悠長假期，七．一當日，我哋見到前保安局局長李少光（光哥）已隨即約埋前高官馬時亨（肥亨），飛赴雲南昆明打波歎世界，前日下午，記者又見到前教育局局長孫明揚同太太鍾小芬喺中環ifc逛超市，難得咁悠閒。
七．一當日，班高官新貴忙到氹氹轉嘅時候，光哥已一身輕便裝束、孭齊球具行李到機場貴賓室，飛得瀟灑。翌日，新政府迎來第一個工作日，下午三點幾鐘，孫公卻陪太座出動，現身ifc間超市買嘢，只見孫公推住架購物車，買吓凍肉、揀吓乳酪，孫太話，孫公無戒口，乜都食，當日特登買餸返屋企煮飯仔，炮製牛柳絲飯，勝在簡單喎。
孫明揚夫婦推住購物車仔周圍閒逛。